Контроверзниот инфлуенсер Ендрју Тејт може слободно да се движи низ Романија откако судот ги олесни ограничувањата за патување.
Од август, Тејт не можеше да патува надвор од областа Букурешт без одобрение од судија. 36-годишниот Тејт се соочува со обвиненија за трговија со луѓе, силување и формирање организирана криминална група.
Многу жени раскажале како тој ги измамил со ветувања за љубов и брак пред сексуално да ги искористи. Сепак, тој и неговиот брат Тристан ги негираат сите обвинувања. И покрај олеснувањето на ограничувањата, кои следеа по неговото појавување на суд во вторникот, тој сè уште не може да ја напушти Романија, пишува Sky News.
Ендрју Тејт им рече на новинарите пред судот дека „работите се движат во вистинската насока“.
„Нема ниту една снимка од малтретирана девојка, ниту една изјава против нас. Ако станеш преголем и премногу успешен, луѓето ќе дојдат и ќе се обидат да те нападнат“, рече тој.
„Ми зедоа 15 автомобили“
Тој го праша судијата дали може да ги врати средствата запленети во јануари, кои вклучуваат луксузни автомобили, дизајнерски часовници и готовина. Надлежните тогаш објавија дека одземениот имот е вреден 3,6 милиони евра. Наведените средства би можеле да се искористат за исплата на компензација на жртвите и за плаќање на истрагата доколку се докажат наводите.
„Зедоа многу работи... 15 автомобили. Многу работи од голема вредност. Би било убаво да си ги вратам работите“, се жалеше Тејт. Сепак, судот го одложи рочиштето за неговиот имот за почетокот на ноември. Браќата Тејт беа уапсени во декември и беа држени во затвор до март, кога беа префрлени во домашен притвор.
Обвинението против нив и двајца сообвинети беше поднесено во јуни. Тејт брзо се прослави во изминатите неколку години благодарение на клиповите од неговите говори што се појавуваат на TikTok и на други платформи. Тој е баниран од повеќето мејнстрим социјални мрежи, освен X, каде што има речиси осум милиони следбеници.
