Антиисламскиот популистички десничар Херт Вилдерс извојува убедлива победа на општите избори во Холандија.
Лидерот на Партијата за Слобода (ПВВ - Partij voor de Vrijheid) и победник на синоќшните избори во Холандија, Херт Вилдерс, сака да се бори против „хистеричната русофобија“, а во таа насока порача дека „Русија не е непријател“ и дека „не треба такво нешто да се прави од неа“.
Тој го гледа рускиот претседател Владимир Путин како сојузник во борбата против тероризмот и масовната имиграција од Африка. Планира да ја посети Русија следната година за да стане јасно дека „не сите во Холандија се антируски настроени“.
Според него, Холандија може многу да научи од Русите во однос на патриотизмот.
Вилдерс ги осуди политичарите кои, според него, играат политички игри поставувајќи лажни непријателски слики. Минатата недела, холандската министерка за внатрешни работи, Касја Олонхрен, предупреди на обидите на Русија да влијае на јавното мислење во Холандија преку лажни вести и интернет тролови.
Вилдерс, кој Politico го нарече „најлошиот кошмар во Европа“, вели дека сака да ја балансира „хистеричната русофобија што владее во Холандија“.
Лидерот на ПВВ, исто така, рече дека го разбира чувството на Русија дека е опкружена со НАТО што напредува.
„Јас сум голем обожавател на НАТО и на Американците, но тука Русија има право“, рече тој.
Тој смета дека не е добро сè што прави Русија, но гледа интереси и сличности меѓу Русија и Холандија.
По 25 години во парламентот, неговата ПВВ треба да освои дури 37 пратенички места (23,5%), што е значително повеќе од нејзиниот најблизок ривал Зелено-Левиот сојуз (GroenLinks–PvdA) кој освои 25 места (15,5%).
„ПВВ повеќе не може да се игнорира. Ќе владееме“, рече Вилдерс.
Неговата победа ја потресе целата холандска политика и јавност. Но, сега ќе мора да ги убеди другите партии да му се придружат во коалиција за да владее со Холандија.
Неговата цел е 76 пратенички места од вкупно 150.
Пред гласањето, другите три големи партии ја отфрлија можноста за учество во влада предводена од Вилдерс поради неговата екстремно десничарска политика. Но, тоа може да се промени поради размерите на неговата победа.
Зелено-Левиот сојуз предводен од поранешниот еврокомесар Франс Тимерманс треба да биде втор со 25/24 места во парламентот. Тој јасно стави до знаење дека нема да има никаква врска со влада предводена од Вилдерс. Станува збор за коалиција на партиите ЗеленаЛева (GroenLinks) и Партијата на трудот (Partij van de Arbeid).
„Време беше да се брани холандската демократија и владеењето на правото. Нема да дозволиме никого во Холандија да си оди. Сите се еднакви во Холандија“, рече Тимерманс.
Лидерот на Партијата за Слобода, Херт Вилдерс, директно ги повика своите политички ривали на заедничка соработка, но според првите реакции тоа тешко ќе го направи.
Победата на Вилдерс ќе ја потресе цела Европа бидејќи Холандија е еден од основачите на она што се нарекува Европска Унија.
Националистичките и екстремно десничарските водачи ширум Европа го пофалија неговото достигнување. Лидерката на француската партија Национален собир (Rassemblement National), Марин Ле Пен, рече дека тоа „ја потврдува зголемената посветеност на одбраната на националните идентитети“. Унгарскиот премиер Виктор Орбан веднаш му ја честиташе победата.
Вилдерс сака да одржи референдум за напуштање на ЕУ, наречен Нексит (Nexit), иако признава дека во моментов нема национално расположение за тоа.
Тој ја ублажи својата антиисламска реторика пред гласањето, велејќи дека во моментот има поитни прашања и дека е подготвен да ја прекине својата политика за забрана на џамии и исламски училишта.
Стратегијата беше очигледно успешна, повеќе од удвојувајќи го бројот на неговата ПВВ во парламентот.
