Меѓународната фудбалска федерација (ФИФА) најави построги казни во борбата против расизмот, а ажурираниот Дисциплински правилник ќе почне да се применува од понеделник, 15 јули.
По речиси 15 години без поголеми промени во Дисциплинскиот правилник, новата верзија е направена во договор со шест конфедерации и други клучни играчи во фудбалскиот свет. Сега е подобрена структурата, правилата се појасни и наместо 147, има 72 членови.
Промените следеа по низата инциденти на натпревари во минатата сезона на националните првенства, но и на меѓународни натпреваувања.
Во договор со мрежата Fare, начелото за нула толеранција на расизам во каков било облик на дискриминација е ажурирано во согласност со неодамнешната изјава на претседателот на ФИФА - дека во фудбалот нема место за дискриминација.
На листата предвидени казни се: играње без публика, играње на неутрален терен, одземање бодови, исфрлање во натпреварување од понизок ранг, исфрлање од турнир или од идни натпреварувања, како и повторување на натпревари.
Минималната забрана за играчи и вработени во стручниот штаб се зголемува од 5 на 10 натпревари, а на играчите жртви на расистичко однесување ќе им се овозможи и да даваат изјави и да учествуваат во постапките.
Ажурираниот Дисциплински правилник го проширува опсегот на она што се смета за дискриминаторно однесување на сѐ што се однесува на расата, бојата на кожата, етничка, национална или општествена припадност, пол, инвалидитет, сексуална ориентација, јазик, вера, политичко мислење и определба, богатство...
Согласно новиот Правилник, ќе има можност за изрекување забрана за трансфер на клубовите кои не ги исполнуваат обврските во случаи што ги обработуваат ФИФА и Арбитражниот суд за спорт.
Како општо правило, натпреварот автоматски се губи ако судијата ја прекинал средбата откако ја применил постапката во три чекори за дискриминаторни инциденти.
„ФИФА нема да ги изневери жртвите на расистичко малтретирање. За првиот прекршок ќе има ограничување на бројот на гледачи и парична казна од најмалку 20.000 швајцарски франци“, стои во соопштението од ФИФА.