Министерот за здравство Венко Филипче истакна дека една од препораките кои се донесени денеска на владина седница со цел да се спречи формирање на групи граѓани и ширење на коронавирусот е да не се напуштаат домовите по 18 часот без особена потреба.
„Досегашната препорака беше да не се напуштаат домовите по 21 часот, но сега со скратување на работата на угостителските објекти, се намалува препораката за по 18 часот“, истакна тој.
Состојбата со короната е стабилна, но и натаму е многу критична со оглед на бројот на заболени и хоспитализирани. Слободни кревети има во континуитет, а факторот на преносливост е под еден по извесен период. Но, тоа не треба да не опушти и не смееме да си дозволиме еден поинаков пристап доведе до влошување на ситуацијата, истакна денеска министерот за здравство Венко Филипче.
„Меѓу мерките се: скратување на работно време на угостителски објекти, забрана за новогодишни настани на плоштади од страна на општините, забрана за новогодишни или предновогодишни забави од работни организации, укажување на верските заедници да не повикуваат на масовни групирања и собири за верските празници и препорака да нема собирање по домови ниту пак во викендиците во викенд населбите, по примерот на тоа што го препорачавме на почетокот на кризата, и уште еден апел, тоа што беше на сила по 21 часот да не се излегува од дома по 18 часот за да се избегнат ризици од формирање групи на граѓани“, рече Филишче.
Препораките да не се организираат прослави и забави остануваат на совеста на граѓаните, рече Филипче, бидејќи нема друг механизам да се забрани групирање во домовите и тоа да се контролира, со оглед дека интегритетот на домот е загарантиран со устав, истакна министерот за здравство.
На денешната прес-конференција тој информираше дека во фаза на поставување се и модуларните болници. Во Гевгелија веќе е завршена инсталацијата, а следува поставувањето во Штип, Битола, Струга, Кичево, Струмица.