Стратегот на Наполи открива дека Шон Конери порано го убедувал да не си оди од Ренџерс кога Италијанецот настапуваше за шкотскиот клуб пред 22 години.
Шон Конери беше страствен навивач на Ренџерс. Поранешниот Џејмс Бонд почина во саботата, а Џенаро Гатузо на вчерашната прес-конференција мораше дел да му посвети токму нему бидејќи своевремено настапуваше за неговиот омилен тим. За година дена во Ренџерс настапи на 51 натпревар и постигна 5 голови со што ги освоил симпатиите на славниот актер.
„Го сретнав само еднаш. Тогаш претседател беше Дејвид Мареј, а тој беше член на управниот одбор. Вистина е, една вечер имав разговор со него и тој ме замоли да не си одам“, рече Гатузо.
Популарниот Рино потпиша за Ренџерс кога беше уште тинејџер, на 19-годишна возраст во 1997 година. Не се снајде во Шкотска бидејќи кога настана смена на тренерите, новиот предводник Дик Адвокат го играше на за него неприродната позиција десен бек, па Гатузо си замина во октомври 1998 година и се врати во Италија во тогаш новајлијата Салернитана.
„Само сакам да му пратам една топла прегратка на целото негово семејство. Јас дефинитивно имам убави сеќавања од него. Имаше голем шарм, одлична личност, тој ја испиша филмската историја“, се сеќава тој.
Гатузо беше прашан и дали некогаш Конери му предложил да се проба во глумењето.
„Не, бидејќи јас дефинитивно го немам неговиот шарм. Дозволете ми да кажам уште еднаш, јас секогаш ќе го чувам во моите спомени“.