Германската Влада формално призна дека нејзините вооружени сили извршиле геноцид врз домородниот народ во она што е денес Намибија и објави дека на земјата ќе ѝ надокнади за штетите од колонијалното време.
Министерот за надворешни работи, Хајко Мас, денеска соопшти дека Германија ги признава извршените злочини од страна на нејзините колонијални трупи врз домородните народи Хереро и Нама помеѓу 1904 и 1908 година. Додаде и дека официјален Берлин сака да најде заеднични начин на според кој намибискиот народ ќе им прости на Германците како сеќавање на сите жртви.
„Отсега па натаму, Германија овие настани официјално ќе ги класификува како геноцид“, додаде Мас.
Како еден вид на обелување на образот Германија ќе отвори инвестициски фонд со 1,1 милијарда евра кој ќе биде наменет за модернизирање на инфраструктурата, здравството и образование на населението во Намибија. Планот е парите да бидат инвестирани етапно во наредните 30 години.
Домородните племиња Херео и Нама биле речиси истребени за време на бунтот против германската колонијална власт во она што некогаш била Германска Југозападна Африка. Се претпоставува дека помеѓу 1904 и 1908 година се убиени од 65 до 80 илјади Хереро кои живееле во германската колонија, како и 10 илјади од вкупно 20-илјадниот народ Нама. Многумина преживеани од бунтот подоцна биле апсени и праќани во концентрациони логори каде биле користени како робови. Лошите услови за живот во тие логори биле причина за смрт на големиот дел од овие луѓе.