Германските обвинители од измамник конфискувале биткоини во вредност од повеќе од 50 милиони евра (60 милиони долари), но проблемот е во тоа што тие не можат да ги отклучат парите затоа што тој одбива да им ја даде лозинката.
Човекот беше осуден на затворска казна и ја издржа, но не сака да ја открие лозинката, а полицијата прави постојани неуспешни обиди да го пробие кодот за пристап до повеќе од 1.700 биткоини, изјави денеска обвинител во баварскиот град Кемптен.
– Го прашавме, но не сака да ја каже, изјави за Ројтерс обвинителот Себастијан Мурер, пренесува Yahoo Finance. – Можеби не ја ни знае, дополни Мурер.
Биткоинот се чува на софтвер познат како дигитален паричник кој е обезбеден преку криптирање. Лозинката се користи како клуч за декрипција за да го отворите паричникот и да пристапите до биткоинот. Кога лозинката е изгубена, корисникот не може да го отвори паричникот.
Измамникот е осуден на повеќе од две години затвор за прикриено инсталирање на софтвер на други компјутери за да ја искористи нивната моќ за да произведува биткоини.