За време на борбите во областа Запорожје, каде што украинските војници ја ослободуваат својата окупирана територија, загина началникот на Генералштабот и командант на руската 35-та армија, генерал-мајор Сергеј Горјачев.
Неговата смрт ја пријавија руски воени блогери. Според нив, тој бил убиен во украински ракетен напад за време на борбите покрај реката Мокри Јали, каде што украинските војници ослободиле седум села.
„Началникот на Генералштабот на 35-та армија загина како резултат на ракетен напад“, изјави рускиот воен дописник Јуриј Котенок на неговиот канал Telegram, наречен Vоенкор Котенок Z.
Тој го опиша генералот како еден од најпаметните и најефикасните воени лидери кој комбинирал „максимален професионализам и лична храброст“.
Бил учесник во Втората чеченска војна, командувал со руските сили во Молдавија во Придњестровје во 2013 година. На почетокот на инвазијата, Горјачев бил командант на 5-тата одделна тенковска бригада, а за време на војната бил унапреден на функцијата началник на армискиот штаб.
Врз основа на отворени извори, потврдена е смртта на петорица руски генерали, 58 полковници и 176 потполковници. Познати се имињата на загинатите генерали: генерал-мајор Канамат Боташев (пензиониран, наводно се борел во Вагнер), командант на 1-от армиски корпус на самопрогласената ДПР, генерал-мајор Роман Кутузов, заменик командант на 41-та Здружена армија на Армијата на Централниот воен округ, генерал-мајор Андреј Суховетскиј и заменик-командантот на 8-та армија, генерал-мајор Владимир Фролов, и генерал-мајор Олег Митјајев, командант ан 150-тата моторизирана дивизија Таман.
Горјачев е првиот генерал кој е убиен на позицијата началник на Генералштабот, односно командант на армиска група.
