Од Град Скопје ја демантираат веста дека сметката им е блокирана.
„Сметката на Град Скопје не е блокирана ниту, пак, е загрозено материјално-финансиското работење на администрацијата. За жал, точно е дека Град Скопје има неплатени обврски кон приватни субјекти, а во случајот се работи за долг што го направил ексградоначалникот Коце Трајановски, а потоа не успеал да го плати ниту ексградоначалникот Петре Шилегов.
Ваквиот начин на работа на овие политичари и нивните политички опции не само што го загрозуваат работењето на Градот, како во случајот, туку 33 години ја ставаат државата во должничко ропство. Повеќе од три децении граѓаните на Р. Македонија отплаќаат долгови што ги генерира секоја владејачка гарнитура полнејќи си ги сопствените приватни џебови со пари што денес ги враќаат граѓаните“, велат од Градот.
Од таму додаваат дека во последната година успеале да го вратат својот кредитен рејтинг на највисоко ниво во последните 15 години за што, како што посочуваат, предуслов е токму намалувањето на акумулираните долгови, систематското материјално-финансиско работење и консолидацијата на финансиите.
„Сепак, ја разбираме потребата на поединци, кои во недостиг на идеја со полуинформации креираат сензационализам“, додаваат од Град Скопје.