Шведски суд денеска повторно ја казни климатската активистка Грета Тунберг поради непочитување на полицијата за време на еколошки протест во јужна Шведска во јули.
Окружниот суд во Малме ѝ нареди да плати казна од 2.250 круни (195 евра).
Тунберг, која веќе била казнувана за сличен прекршок, учествуваше на еколошки протест на 24 јули на нафтениот терминал во Малме, каде што активистите привремено го блокираа пристапот до објектот со протест со седење и беа отстранети од полицијата. На 1 септември таа беше обвинета за непослушност на полицијата бидејќи одбила да ги послуша наредбите да го напушти местото на настанот.
Во таа прилика била влечена од двајца униформирани полицајци. Тунберг (20) ги призна фактите, но ја негираше вината, велејќи дека борбата против индустријата за фосилни горива е форма на самоодбрана поради егзистенцијалната и глобалната закана од климатската криза.
„Ние ја имаме науката на наша страна и го имаме моралот на наша страна“, рече таа по пресудата, пренесува Associated Press.
На 24 јуни, истиот суд ја казни со парична казна од 2.500 круни (околу 215 евра) затоа што одбила да ги почитува полициските наредби кога учествувала на слични протести, каде што таа и други го блокирале пристапот до истиот терминал за нафта пред да биде отстранета од полицијата.
Тунберг утре треба да отпатува во соседна Норвешка за да учествува на протест со активисти, меѓу кои и домородните Сами. Тие протестираат против паркот со ветерници со 151 турбина и бараат негово отстранување бидејќи велат дека го загрозува начинот на живот на сточарите.
Активистите сметаат дека транзицијата кон зелена енергија не треба да биде на сметка на правата на домородните луѓе.