Лидерот на ВМРО-ДПМНЕ, Никола Груевски, рече дека на Македонија денеска ѝ се случиле мафијашки избори. Тој побара предвремени парламентарни избори и испорача седум барања до власта.
„Заради изборното насилство, заради силување на демократијата и на државата и евидентирани изборни нерегуларности, заради бруталниот терор во овие 5 недели, притисоци и поткуп, Извршниот комитет на ВМРО-ДПМНЕ донесе одлука дека не ги признава овие избори и нема никогаш да ги смета за фер и демократски. Покрај тоа, ВМРО-ДПМНЕ бара итно враќање на демократијата во земјата и бараме организирање на предвремени парламентарни избори согласно Пржинскиот договор спроведени од техничка влада на ист начин како изборите на 11 декември минатата година. Ајде Заев ако си толку силен и јак да одиме на избори. Најмалку што можеш е и ти да се согласиш да одиме на избори“, рече Груевски.
Тој побара итна смена на директорот на Агенција за аудио и аудиовизуелни медиумски услуги, оставка од претседателот на ДИК Александар Чичаковски, итна истрага и вештачење на уредите за прислушкување на уредите на УБК со кои се прислушуваат, како што рече, најмалку 100 лица од ВМРО-ДПМНЕ, итно завршување на судењето за случајот „Поктуп“, основање на специјално јавно обвинителство кое ќе има ингеренции за расчистување на изборните нерегуларности од изборите во 2016 и 2017 година и итно ослободување на сите граѓани осомничени за насилства во настаните од 27 април.
„Ако Заев има минимум доблест треба веднаш да ги прифати овие барања. Подаваме рака пред да е предоцна, хунтата на Заев ја бутка Македонија во опасно сценарио. Заев и СДС сакаат да лапнат преголем залак ама ќе си ги скршат забите. Оваа битка допрва почнува. Од утре ќе бидеме сведоци на нова пеколна тура, нови малтретирања, акции на МВР за апсења на политички притивници затоа што така мислат дека ќе нè решат. Се лажат, ние ќе издржиме, не се плашиме од вашиот терор, ние сме ВМРО. Ние сме навлечени на Македонија и таа љубов вреди, таа љубов Заев не може да ја разбере, вреди да се бори за Македонија“, рече Груевски.
Лидерот на ВМРО-ДПМНЕ рече дека најголемиот противник на овие избори на неговата партија била полицијата.
„ВМРО-ДПМНЕ на овие избори се соочи со двоен противник. Едниот е СДС, но најголемиот политички противник на овие избори беше полицијата која директно и брутално се ангажираше во партиски цели на СДС. Партиски полицајци на СДС брутално се конфронтираа со македонскиот народ. Ги знаеме сите лица кои ја киднапираа македонската полиција и по враќање на ВМРО-ДПМНЕ на власт ќе се соочат со санкции“, рече Груевски.
