Верувате или не во Дедо Мраз, шведскиот голгетер сепак докажа дека тој е оној кој ги носи подароците. Барем во Милано.
Златан Ибрахимовиќ сам се декларираше за Дедо Мраз бидејќи, како што вели, носи подароци за 25 соиграчи во Милан, плус за неговите две деца во Шведска.
„Никогаш не сум побарал нешто за мене за Божик. Јас сум Дедо Мраз. Јас сум тој што носи подароци за сите мои 27 деца: две се во Шведска, а другите 25 се во Миланело“, рече Ибра говорејќи за SportWeek.
Токму тој е предводник на единствениот непоразен тим од големата петка на Стариот континент, рачувајќи ги сите натпревари после прекинот поради пандемијата. Згора на тоа, Милан е и лидер во Серија А сезонава.
„Оваа година, големи честитки за она што го направивме и што го правиме. Загубивме само неколку натпревари. Не знам дали тоа е поради мене, но и јас имам удел, му дадов нешто на овој тим“
Сепак, Ибра има една желба, а тоа е да ја добие Златната топка на France Football. Дури 12 пати ја има добивано истоимената награда за фудбалер на годината во Шведска која ја доделуваат весникот Aftonbladet заедно со Шведската фудбалска асоцијација насловена како Guldbollen, но би ги трампал сите 12 за една на France Football.
„Би ги заменил моите 12 Guldbollen за една од France Football бидејќи, за мене, тие значат континуитет. Сум видел многумина како освојуваат Мундијал, ЕУРО, Лига на шампиони, дури и Златна топка, имале неверојатна година, фантастична, а потоа исчезнале. А, пак, јас сум во игра 25 години. Секогаш на врвот. Тоа е голем разлика“, објаснува тој.
Првпат Guldbollen Ибра ја доби во 2005, а потоа од 2007 до 2016 ја освојуваше 10 пати по ред иако настапуваше за пет различни тимови. Годинава ја освои својата 12-та Guldbollen, со дури 39 години. Тој е убедливо лидер по добиени награди за играч на годината во Шведска.