Иран претстави нова ракета со дострел од 1.450 километри, објави полудржавната новинска агенција Tasnim, еден ден по продолжувањето на преговорите во Виена за спасување на нуклеарниот договор меѓу Техеран и светските сили од 2015 година.
Ракетата беше претставена за време на посетата на највисоките ирански воени претставници на ракетните бази на Револуционерната гарда (IRGC).
„Ова стратешко оружје е ракета со долг дострел од третата генерација развиена од IGRC, придвижувана од цврсто гориво и способна да ги пробива ракетните штитови со висока способност за маневрирање“, пишува Tasnim.
„Модифицираниот дизајн ја намали тежината за една третина во споредба со слични ракети“, додава агенцијата, нагласувајќи дека времето на подготовка за неговото лансирање е скратено за шест пати.
По тој повод, шефот на вооружените сили Мохамад Багери изјави дека Иран ќе продолжи да ја развива својата ракетна програма, како по квалитет, така и по квантитет.
Делегатите во Виена велат дека не постигнале никаков напредок од обновувањето на разговорите во ноември. Западните сили веруваат дека останува уште малку време пред Иран да развие нуклеарни капацитети што ќе го направат излишен договорот од 2015 година.
Највисокиот ирански функционер за безбедност, Али Шамхани, го критикуваше американскиот пристап.
„Гласовите од американската влада покажуваат дека во таа земја нема кохерентност за да се носат политички одлуки во насока на напредок во преговорите во Виена“, напиша Шамхани на Twitter.