Илјадници луѓе, меѓу кои фудбалери, фудбалски работници и новинари се собраа во Фиренца за да присуствуваат на погребот на прерано починатиот фудбалер на Фиорентина, Давиде Астори., кој минатата недела почина во хотелска соба.
Давиде Астори имаше само 31 година, беше капитен на тимот на Фиорентина и минатата недела почина од срцева аритмија во хотелската соба, додека беше заедно со екипата во Удине, каде се спремаа да одиграат натпревар против Удинезе во рамките на Серија А.
Неговото тело беше пренесено од Удине во Фиренца и беше оставено во седиштето на Фудбалската федерација на Италија.
Погребот беше одржан во Базиликата во Санта Кроче, а први пристигна неговите соиграчи од Фиорентина, а потоа и целиот стручен штаб, како и раководството на овој тим.
На погребот присуствуваше целата италијанска фудбалска елита, меѓу кои се најдоа и Масимилијано Алегри, Џанлуиџи Буфон, дефанзивецот Џорџо Кјелини и останатите играчи на Јувентус, кои пристигна на погребот директно по нивниот реванш-натпревар против Тотенхем од Лигата на шампионите.
„Сега е време за тишина, за молк. Нашите мисли мораат да бидат со неговото семејство, а особено со неговата мала ќерка, која никогаш нема да се сеќава на нејзиниот татко. Давиде секогаш ќе биде со мене, заедно пораснавме во фудбалот и ова е огромно разочарување“, рече Масимилијано Алегри на почетокот на оваа недела.
Илјадници фанови на Фиорентина ги окупираа улиците на Фиренца за да оддадат последна почит за нивниот прерано починат капитен.
Во знак на почит, сите натпревари од Серија А минатиот викенд беа одложени, а Фиорентина и неговиот поранешен клуб Каљари, го пензионираа бројот 13 кој го носеше Давиде Астори. Фиорентина се враќа на прволигашките обврски викендов во натпреварот против Беневенто.