Граѓаните на Полска синоќа излегоа на гласање, а според првите прелиминарни резултати, големи се шансите актуелната конзервативна влада на чело со партијата Право и правда (ПиС) повеќе да не биде на чело на државата.
Иако гласовите сѐ уште се пребројуваат, можеби побавно од очекуваното, медиумите во Полска веќе ги имаат прелиминарните резултати и покажуваат дека ПиС (PiS) освоил 40,17% од гласовите, додека Граѓанската платформа (KO), односно сојузот на опозициските партии на чело со Доналд Туск освоил 26,26% од гласовите.
Потенцијално важната партија за формирање влада, Трет пат (Trzecia Droga), освои 13,97% од гласовите, додека Нова Левица (Nowa Lewica) има поддршка од 8,09% од гласовите.
Според прелиминарните резултати, партнерите на актуелната влада, десничарската партија Конфедерација (Konfederacja), целосно потфрлија и моментално имаат 7,41% од гласовите, што значително го отежнува потенцијалното формирање влада на ПиС.
Резултати од 9:33 часот денеска:
• PiS - 40,17%
• Koalicja Obywatelska - 26,26%
• Trzecia Droga - 13,97%
• Nowa Lewica - 8,09%
• Konfederacja - 7,41%
• Bezpartyjni Samorządowcy - 1,88%
• Polska Jest Jedna - 1,71%
Сепак, додека се пребројуваат гласовите, она што е особено интересно да се набљудува е моменталната карта на Полска, која се базира на досега преброените гласови.
Изборната кампања најмногу беше насочена кон навреди и зајакнување на поделбите, а се чини дека резултатите од изборите јасно потврдија дека Полска во моментов е крајно поделено општество.
Имено, според мапата на полски Onet, западот на земјата мнозинството гласови му ги додели на Доналд Туск, односно на сојузот на опозициските партии.
Граѓанската коалиција почесто ја поддржуваат жителите на големите градови, додека во руралните средини победник е Право и Правда, објаснуваат оттаму.