Фудбалскиот сојуз на Јордан побара истрага од Азиската фудбалска конфедерација за да се утврди полот на голманката на иранската репрезентација, за која се сомневаат дека е маж. Техеран тоа го негира.
Иран се пласира на Азискиот куп за жени 2022 година со победа над Јордан со 4 : 2. Херој на натпреварот беше иранската голманка Зохреха Кудаји за која Јорданците тврдат дека е маж.
Претседателот на Јорданскиот фудбалски сојуз, принцот Али бин Ал Хусеин, објави писмо во кое бара проверка на полот, сугерирајќи дека голманот е маж кој се претставува како жена.
Хусеин тоа го опиша како „многу сериозен проблем доколку е вистина“ и повика Азиската фудбалска конфедерација да се „разбуди“.
Но, иранската селекторка Мајрам Ирандост ги отфрли обвиненијата.
„Лекарски тим детално ги прегледа сите фудбалерки на репрезентацијата“, изјави за иранските медиуми, порачувајќи дека ќе го даде секој документ потребен за Федерацијата.
Азискиот куп за жени треба да се одржи во Индија од 20 јануари до 6 февруари.
