Скопје, 18 март 2021 (МИА) – Ново рочиште во Кривичниот суд Скопје денеска е предвидено да се одржи за предметот „Меѓународен сојуз“.
Судијката Софче Ефремова, на последното рочиште за овој предмет најави дека за денеска ќе треба да сведочат Јордан Камчев и Агапи Дика.
Обвинети во овој случај се Бојан Јовановски, поранешната пратеничка од редовите на СДСМ, Фросина Ременски, Миле Јовановски (татко на првообвинетиот) и Јасна Мандиќ Ерцеговиќ.
Јовановски е обвинет за „измама и перење пари“. Ременски е обвинета за „помагање во делото измама“, Мандиќ за „помагање во измамата и перењето пари“, Миле Јовановски се терети за „помагање во перењето пари“ и за „неовластено изработување, држење, посредување и тргување со оружје“. Како правно лице обвинета е и невладината организација „Меѓународен сојуз“.
Судија по претходна постапка определи мерка притвор од 30 дена за бизнисменот Јордан Камчев на 14-ти месецов.
Истиот ден Камчев беше приведен, а според неговиот адвокат Тони Менкиновски бил лишен од слобода поради кривично дело изборна измама, за подоцна Основното јавно обвинителство за гонење на организиран криминал и корупција да побара притвор поради информацијата од Агенцијата за национална безбедност дека Камчев се подготвувал за бегство.
