Ридли Скот, режисер на хитови како што се Gladiator и Blade Runner, во интервју за Deadline откри зошто го избрал Хоакин Феникс да го игра Наполеон во неговата претстојна историска драма.
Скот претходно работеше со Феникс во Gladiator, каде актерот го играше главниот негативец, но филмот што го натера да го избере Феникс беше Joker од 2019 година.
„Бев воодушевен од неговиот контроверзен филм Joker. Не ми се допадна што филмот промовира насилство, но Хоакин беше извонреден. Мислев дека ќе биде одлично засилување за Наполеон, не само креативно, туку и комерцијално. Имав само двајца актери на ум за оваа улога. Нема да кажам кој е другиот“, рече Скот.
Сценариото за Napoleon го напиша Дејвид Скарпа, кој веќе работеше со Скот на филмот All the Money in the World. Napoleon го следи подемот и падот на францускиот генерал и император низ призмата на неговата страсна врска со царицата Жозефина, која во филмот ја игра Ванеса Кирби.
Скот откри дека одлучил да сними филм за Наполеон бидејќи ја сака Франција, каде што одел на одмор како тинејџер.
„Отсекогаш ми се допаѓаше францускиот начин на живот. Никогаш не сум ги заборавил летните одмори во Франција. Толку го сакам Париз што имам канцеларија таму. Мојот прв филм The Duelists беше за Наполеон, само Наполеон не се појави во него“, рече режисерот.
Napoleon доаѓа во кината на 22 ноември оваа година, а откако ќе заврши со прикажување во кината, филмот ќе биде достапен на платформата за стриминг Apple TV+.
