Милитантната група Хезболах соопшти дека истрелала 200 ракети врз Израел во еден од најголемите напади до сега.
Групата поддржана од Иран изврши напад на 10 израелски воени локации користејќи „ескадрила беспилотни летала“, пренесува Sky Newshttps://news.sky.com/story/hezbollah-claims-it-has-fired-200-rockets-into-israel-in-one-of-largest-barrages-yet-13163288.
Израелската војска соопшти дека „бројни проектили и сомнителни воздушни цели“ влегле на нејзина територија, од кои многу биле пресретнати.
Израелската служба за итни случаи соопшти дека нема пријавени жртви. Се верува дека денешниот напад е одмазда за убиството на еден од високите команданти на Хезболах.
Израелската армија вчера соопшти дека во вторникот го убила Мохамад Нааме Насер, кој бил шеф на една од трите регионални дивизии на Хезболах во јужен Либан. Насер беше убиен во воздушен напад во близина на крајбрежниот град Тир во јужен Либан.
Во последните денови ескалираа тензиите на границата меѓу Израел и Либан.
Соединетите Американски Држави и Франција вложуваат огромни напори да спречат конфликтот да ескалира во сеопфатна војна што може да се прелее на целиот регион.
Тензиите меѓу Израел и Либан избувнаа веднаш по избувнувањето на војната во Газа. Хезболах вели дека го напаѓа Израел во знак на солидарност со Хамас, друга група сојузничка со Иран. Десетици илјади луѓе од двете страни на границата се раселени поради борбите.
Во северниот дел на Израел загинаа 16 војници и 11 цивили. Во Либан загинаа повеќе од 450 луѓе, главно борци, но и некои цивили. Денешниот напад доаѓа додека израелската влада разговара за договор за фазен прекин на огнот во Газа.
САД стојат зад планот кој бара Хамас да ги ослободи сите заложници во замена за траен прекин на огнот и повлекување на израелските сили од Газа. Сепак, досега се чини дека ниту една од страните не го прифати целосно планот.