Тод Хајнс, режисерот на Far From Heaven и Carol, во интервју за Variety откри дека работи на нов филм со Хоакин Феникс.
Филмот сè уште нема наслов и е љубовна приказна меѓу двајца мажи, сместена во 30-тите, а главниот фокус ќе биде на сексуалната врска меѓу двајцата протагонисти. Еден од нив е американски домородец, а другиот е корумпиран полицаец од Лос Анџелес и заедно бегаат во Мексико.
„Интересно е што сè започна со Хоакин, кој имаше некои идеи, размислувања, прашања и слики. А тој потоа ми пријде и ме праша дали чувствувам некаква поврзаност со приказната. Му реков: ‘Да, ова е многу интересно.' Разговаравме на телефон и на крајот тоа се претвори во сценарио“, изјави Хајнс.
Режисерот исто така додаде дека Феникс инсистирал да ги поместат границите кога станува збор за прикажување на сексуални односи.
„Хоакин ја турка приказната сè повеќе и подалеку кон опасна територија, во сексуална смисла“, откри Хејнс.
Филмот ќе се снима во Мексико, а режисерот веќе почнал да работи со мексиканските филмаџии за да може да започне продукцијата што е можно поскоро. Снимањето треба да започне во летото 2024 година.
