Кина денеска го повика НАТО да не „излегува од своите географски параметри“, додавајќи дека северноатлантската алијанса „се проширува од крајот на Студената војна“.
„Како регионална организација, НАТО треба да остане во рамките на своите географски параметри и не треба да се обидува да наметнува правила што ѝ одговараат или да се обидува да прошири, па дури и да премине одредени граници“, рече Жао Лиѓијан, портпарол на кинеското Министерство за надворешни работи, на денешната прес-конференција во Пекинг.
Тој го обвини НАТО за „зголемување на бројот на интервенции во низа цивилни домени, вклучувајќи климатски промени, инфраструктура, технолошки иновации, синџири на снабдување, здравје и енергија“.
„НАТО ја надмина својата колективна одбранбена клаузула во доменот на интернетот и вселената, со кои треба да се занимаваат ОН и специјализираните меѓународни институции“, додаде кинескиот функционер.
Кинезите реагираа на изјавата на генералниот секретар на НАТО
Кинеското Министерство на тој начин одговори на изјавата на генералниот секретар на НАТО, Јенс Столтенберг, кој во понеделникот во Шпанија рече дека „сојузниците го диверзифицираат своето снабдување“, додавајќи дека тоа е „добро за нашата безбедност“.
„Отпорноста и заштитата на нашите општества и инфраструктура сега се многу високо на агендата на НАТО“, рече Столтенберг, осврнувајќи се на новиот стратегиски концепт на НАТО претставен на самитот на Алијансата претходно оваа година во Мадрид.
„Нашиот сегашен стратешки концепт се однесува на предизвиците што Кина ги поставува за нашата безбедност, нашите вредности и интереси. Дел од тоа е свесноста за тоа колку Кина се приближува и се обидува да контролира критични делови од нашите општества“, рече Столтенберг.
Предупредување
Сепак, Кина денеска соопшти дека „развојот на глобалниот индустриски синџир на снабдување е резултат не само на законите на пазарот, туку и на деловни одлуки“.
„Во последните години Кина разви здрава соработка, заснована на принципите на еднаквост, во соодветни области и со компании и земји од различни региони, вклучително и членки на НАТО, што беше заемно корисно.
Воведувањето идеолошки разлики во економската и трговската соработка и исцртување линии за разграничување врз основа на вредности не е во интерес на меѓународната заедница и може да биде контрапродуктивно“, рече Жао.