Кинеските берзи се во колапс откако инвеститорите ги вознемири одлуката на Народната банка на Кина драстично да го намали нивото на задолжителни резерви на банките, како дел од намерата да го поттикне растот на стопанството.
Банката вчера ја најави мерката за намалување на нивото на задолжителни резерви, односно количеството на пари во кеш што повеќето комерцијални банки мора да го имаат во централната банка, објави CNBC.
Актуелното ниво на задолжителни резерви изнесува 15,5% за големите институции и 13,5% за помалите банки, а од 15 октомври ќе биде намалено за 100 базични поени, соопшти централната банка.
„Намалувањето на задолжителните резерви за 1,0% беше неочекувано бидејќи ќе се ослободат околу 700 милијарди јуани (околу 101,72 милијарди долари) во кинескиот банкарски систем“, оценува Френсис Лун од Geo Securities.
„Тоа се навистина многу пари. Сметам дека владата е загрижена дека стопанството ќе забави и дека берзата на акции ќе падне“, вели Лун.
Поголемиот дел од берзите во континентална Кина денес беа паднати по ваквата одлука, а индексите во Шангај и Шенжен изгубија повеќе од 3,0% од вредноста во текот на тргувањето.
Вредноста на акциите на сите водечки банки во Кина исто така падна по одлуката на Народната банка на Кина – на Industrial and Commercial Bank of China за 3,8%, на Chia Construction за 4,0%, а на Agricultural Bank of China за 2,5%.
