Активисти за спречување на климатските промени на меѓународното движење End Fossil: Occupy вчера ги окупираа просториите на универзитетите во Виена, Инсбрук и Салцбург и најавија дека нивната акција не е временски ограничена.
Активистите, со акцијата наречена Земјата гори, сакаат што побрзо да излезат од системот за снабдување со фосилни горива. Дополнително, како што е најавено, бараат поправеден образовен и социјален систем и повеќе средства за високото образование.
Во Виена, демонстрантите вчеравечер ја окупираа најголемата предавална и одбија да ја напуштат преку ноќ. Во текот на денешниот ден беа организирани предавања на тема климатски промени, а престојот во предавалната беше најавен „барем до следниот четврток“.
„Сакаме да бидеме сфатени сериозно“
Организаторите на протестот строго забранија консумирање алкохол и дрога за време на протестната акција.
„Сакаме да бидеме сфатени сериозно“, рече Амина Гугенбихлер, една од портпаролките на движењето, за агенцијата АПА.
Во Салцбург и Инсбрук, протестни акции почнаа во средата навечер и сè уште траат. Управата на универзитетот соопшти дека засега ги „набљудуваат“ акциите. Воедно беше најавено дека сакаат заеднички да пристапат кон дискусијата на тема климатски промени.