Тренерот на Ливерпул, Јирген Клоп, осврнувајќи се на досегашниот дел од сезоната во Премиер лигата, рече дека и понатаму главен претендент за шампионската титула е Манчестер Сити.
„Граѓаните“ по 17 кола се втори на табелата со еден бод заостанување зад Ливерпул.
„Бидејќи сум целосно објективен ќе кажам дека фаворит е Манчестер Сити. Многу се добри. Актуелни шампиони и сѐ уште играат како шампиони. Мислам дека желбата што ја гледам кај нив, откако станаа шампиони минатата година, е посебна“, изјави Клоп.
Тој за неговиот тим вели дека игра одлична сезона.
„Ќе се обидеме да ги симнеме од престолот. За да успееме во тоа мора да се концентрираме на секој натпревар и да не ни биде резултатот императив. Има уште многу до крајот“, истакна Клоп.
Неговиот тим нема изгубено ниту еден натпревар од почетокот на сезоната.
„Црвените“ победија на 14 средби, три одиграа нерешено. Ливерпул по трет пат во историјата не губи во првите 17 кола. Истиот резултат го постигна и во сезоната 1949/50 кога заврши на 8. Место, како и во сезоната 1987/88 кога стана шампион.
