Телото на фудбалерот Кристијан Ацу е пронајдено во урнатините во турскиот град Антакија 12 дена по силните земјотреси, пишуваат турските медиуми, повикувајќи се на соопштението на неговиот менаџер Мурат Узунмехмет.
Неколку часа по земјотресот беше објавено дека Ацу е пронајден и хоспитализиран, но оваа информација два дена подоцна беше демантирана.
Имаше 31 година, беше играч на турскиот прволигаш Хатајспор, а кариерата ја започна како фудбалер на Порто.
Од португалскиот клуб замина во Челси, а како член на познатиот англиски клуб беше на бројни позајмици.
На крајот беше откупен од Њукасл и таму остана од 2016 до 2021 година.
Во Турција пристигна на почетокот на сезонава, а ден пред земјотресот беше единствениот стрелец во победата на Хатајспор над Касмпаша од 1:0 со гол од слободен удар длабоко во судиското надополнување.
За репрезентацијата на Гана настапи на 65 натпревари и беше дел од составот на Мундијалот 2014 во Бразил и на Африканскиот куп на нации во 2013, 2015, 2015 и 2019. На турнирите во 2015 и 2017 се најде во идеалниот тим на првенството, а во 2015 беше прогласен и за МВП кога неговата Гана загуби во финалето.