Новиот филм на Netflix е окарактеризиран како најлоша адаптација на Џејн Остин досега, сметаат критичарите.
Филмот „Persuasion“, во кој Дакота Џонсон ја толкува главната улога, треба да биде прикажан на 15 јули. Но, оние кои го погледнале филмот во режија на Кери Крекнел, не се баш одушевени од адаптацијата.
„Кренато е ембарго на „Persuasion“ така што конечно можам да кажам дека ова е најлошата адаптација на Џејн Остин што досега сум ја видела“, напиша на Twitter Морган Ли Дејвис од магазинот Bustle.
„Апсолутно непростливо, укинете го Netflix. Укинете ја Дакота Џонсон“, додаде таа.
Филмската критичарка на британски Independent, Кларис Лугреј се сложува дека Џонсон во филмот е „жалосно погрешно прикажана“, додавајќи:
„Ниту во еден момент немате чувство дека всушност некој навистина ја прочитал „Perusasion“. За оние кои имаат и најмал афинитет кон делото на Остин малку е понижувачки да ја гледате една од најубаво обликуваните протагонистки прогонувана од духовите на изгубената љубов, лишена од нејзината поезија и сведена на натпис на Instagram за стапица на модерните состаноци“.
Лургеј на филмот му даде оцена од една ѕвезда, исто како и Венди Ида од британскиот Guardian.
И критичарот на британски Telegraph Тим Роби во неговата рецензија за адаптацијата наведе дека „истата доаѓа скоро со целосно занемарување на изворниот материјал“.
