Рускиот министер за надворешни работи Сергеј Лавров синоќа изјави дека испораката на оружје за Украина од Запад значи дека НАТО „во суштина е во војна со Русија“ и дека постои „значителен“ ризик конфликтот да прерасне во нуклеарна војна.
Говорејќи за првиот канал на Русија во понеделникот, тој рече дека Москва сака да избегне „вештачки“ зголемени ризици од таков конфликт, пренесува BBC.
„Ова е нашата клучна позиција на која темелиме сè. Ризиците сега се значајни. Не би сакал вештачки да ги зголемувам тие ризици. Многумина би го сакале тоа. Опасноста е сериозна, реална и не смееме да ја потцениме“, рече Лавров.
Лавров, исто така, го обвини украинскиот претседател Володимир Зеленски дека „се преправа“ дека преговара, нарекувајќи го „добар актер“.
„Ако внимателно гледате и внимателно читате што вели, ќе најдете илјадници противречности“, рече првиот човек на Русија за надворешни работи.
Да потсетиме, рускиот министер за надворешни работи минатата недела изјави дека Москва е посветена на избегнување нуклеарна војна.
Во понеделникот, украинскиот министер за надворешни работи Дмитриј Кулеба твитна дека последните коментари на Лавров се показател дека Русија ја изгубила својата „последна надеж да го исплаши светот да не ја поддржи Украина“.
„Вака се зборува за ‘вистинската’ опасност од Трета светска војна. Тоа само значи дека Москва се чувствува поразено во Украина“, напиша тој на Twitter.
Неколку дена по почетокот на инвазијата на 24 февруари, рускиот претседател Владимир Путин им нареди на сите руски нуклеарни сили да бидат на готовс.
САД и нивните сојузници во НАТО изјавија дека не сакаат директна воена интервенција во Украина за да се избегне ризикот од Трета светска војна.
