Уругвајскиот фудбалер Дарвин Нуњес би можел да тргне по стапките на сонародникот Луис Суарес и кариерата да ја продолжи во тимот на Ливерпул, пишуваат англиските медиуми наведувајќи дека „црвените“ се подготвени да ѝ платат на Бенфика дури 100 милиони евра со бонуси за неговите услуги.
Иако клубот во моментов е исклучиво фокусиран на договорите на Садио Мане и Мохамед Салах, Ливерпул полека се подготвува за живот по напаѓачкото дуо и во тој поглед се чини дека во Бенфика најде соодветен играч за својот систем на игра.
Уругваецот оваа сезона „експлодира“ во дресот на Бенфика и го привлече вниманието на многу европски клубови, меѓу кои и Манчестер Јунајтед, но Ливерпул е најголемиот фаворит за негово доведување, пишуваат островските медиуми, особено откако клубот остана без претходно планираните засилувања кои ги држеше во тајност.
Нуњес има само 22 години, а минатата сезона постигна 26 гола и беше најдобар стрелец во португалската лига, додавајќи шест гола во Лигата на шампионите.
Најдобар показател за каков играч се работи е тоа што Бенфика за неговите услуги пред две години плати 24 милиони евра на шпанскиот второлигаш Алмерија. Во периодот од 2017 до 2019 година настапуваше за уругвајски Пењарол, а националниот тим дебитираше во 2019 година.