Организациите под чадорот на Платформата за родова еднаквост повикуваат на осмомартовски марш под слоганот „Сиромаштијата има женско лице“, со почеток во 12 часот.
На 8 Март, со почит кон досегашните победи на жената за родовата еднаквост, но свесни за секојдневните системски недостатоци кои го загрозуваат нашето постоење како слободни, еднакви, достоинствени и безбедни, оваа година маршираме под слоганот „Сиромаштијата има женско лице“. Овој 8 Март го одбележува женската сиромаштија, овозможена од системот, а продлабочена како резултат на двегодишната пандемија на COVID-19 и нејзините последици, се вели во повикот.
„На овој марш, заеднички ќе упатиме порака дека и покрај тоа што ние жените сме еднаква половина од населението во државата, сѐ уште не уживаме еднаквост во речиси ниту еден аспект од нашите животи, на работа или дома, во политиката и социјалниот живот. Маршираме бидејќи држава во која жените не се вклучени како еднакви, е држава во која нема напредок. Општество во кое жените се невработени и преработени, незаштитени, виктимизирани, објективизирани и лишени од своите права, е сиромашно општество“, порачуваат организаторите.
Маршот ќе почне во 12 часот пред Влада, од каде што, по обраќањето на Платформата за родова еднаквост, маршот ќе продолжи по предвидената рута и ќе заврши во Паркот Жена Борец, со обраќање до јавноста и институциите.