Фудбалерите на Милан и Салернитана ги поделија бодовите синоќа на „Меаца“ во 26. коло од Серија А играјќи 1:1, а натпреварот го одбележа една бизарна ситуација.
Имено, на две минути пред крајот на натпреварот Милан имаше одлична шанса по која можеше да постигне гол вреден три бода.
По еден центаршут од левата страна настана огромна гужва во шеснаесетникот на гостите, а на крајот Алесандро Флоренци ја испрати топката кон голот.
Следуваше лоша реакција на играчот на гостите, Словакот Норберт Ѓембер, но гостите на неверојатен начин ги спаси играчот на Милан, Пјер Калулу, кој падна пред гостинскиот гол и ненамерно со лактот ја сопре топката на гол-линијата. Така, конечниот резултат остана 1:1.
Инаку, Милан поведе кон крајот на првото полувреме со голот на Оливје Жиру, додека Салернитана израмни откако Булај Диа го искористи додавањето на Домагој Брадариќ.
По 26. коло Милан е на четвртото место во Серија А, додека Салернитана е на 16. место. Во следното коло Милан ќе гостува кај Удинезе, додека Салернитана ја пречекува Болоња.
Интересно, Милан иако важеше за огромен фаворит на овој натпревар, не успеа да победи и да ги искористи киксовите на конкурентите за да продре до второ место. Имено, ова коло киксираа сите четири екипи кои се борат за трите места кои водат во Лигата на шампионите. Низата ја почна Интер во петокот кога шокантно загуби на гостувањето кај Специја со 2:1, во саботата Лацио одигра 0:0 кај Болоња, во неделата Рома загуби дома од Сасуоло со 3:4, а синоќа завесата ја спушти Милан.
