Брод на воената морнарица кој бил во потрага по исчезнатите од воениот транспортен авион со 120 патници, денес во морето кај Мјанмар пронашол делови од телата и авионот.
Авионот од кинеско производство „Y-8“ исчезнал од радарите вчера, половина час по полетувањето од местото Мјеик, а преку Андаманското море летал кон Јангон, економската престолнина на Мјанмар. Во моментот кога полетал авионот паѓал ситен дожд.
Девет бродови на воената морнарица, пет воени и три цивилни хеликоптери биле во потрага по исчезнатиот авион, изјави портпаролот на војската на Мјанмар.
Тој рекол дека биле пронајдени два појаси за спасување, три тела, на маж. жена и дете и гума која била дел од авионското тркало. Телата и деловите од авионот биле пронајдени во морето западно од местото Лаунг Лоне.
Во авионот кој вчера исчезна од радарите имало 106 патници, во најголем дел семејства на воениот персонал, и 14 членови на екипажот. Армијата соопшти дека авионот го добила во март минатата година и дека вкупно летал 809 часа.
