Од 1.323 основци и средношколци досега опфатени со скринингот за откривање COVID-19 во училиштата, вирусот бил потврден кај шест ученици во основното образование, а 1.317 ученици биле негативни на тестот.
Тестирани се 725 основци од прво до деветто одделение и 598 средношколци од подрачјето на Кочани, Штип, Велес, Скопје, Куманово, Прилеп, Битола, Струмица, Тетово и Охрид,
Министерството за здравство соопшти дека ги објавува досега обработените податоци за првите денови од скринингот, кој го прават центрите за јавно здравје во 496 средни и основни училишта на територија на цела држава. Тие постапуваат согласно донесениот Алгоритам за училиштата во случај на појава на ученик со симптоми или сомнителен на вирусот.
– За поголем дел од центрите за јавно здравје скринингот завршува утре, а крајните резултати центрите мора да ги испратат најдоцна до средината од следната седмица. По обработката на податоците Министерството за здравство ќе ја објави целосната анлиза со што ќе се добие генерална слика за присуство на вирусот меѓу учениците во училиштата, наведува Министерството за здравство.
Информира и дека во моментов активни на вирусот во земјава се 885 деца на возраст од 0 до 17 години. На Институтот за белодробни заболувања Козле хоспитализирани се 19 деца на возраст од 9 до 16 години. Еден пациент е на кислородна поддршка, а сите останати се со лесна клиничка слика. Ниту едно од хоспитализираните деца не е вакцинирано.
Според податоците од националниот систем Мој термин, досега во земјава 5.800 деца на возраст од 12,13,14,15,16 и 17 години примиле една доза антиковид-вакцина, а ревакцинирани се 4.860 малолетници.