Продуцентските куќи Warner Bros. и New Line Cinema и Embracer Group, шведската компанија за игрици којашто ги поседува правата на повеќето од делата на Толкин, потпишаа договор за нови продолженија на „The Lord of the Rings“ и „The Hobbit“. Според договореното, се најавува снимање на повеќе филмови по книгите на писателот Џ.Р.Р. Толкин.
Вкупната вредност на новиот договор сѐ уште не е откриена.
Првичната филмска трилогија на режисерот Питер Џексон продуцирана од New Line Cinema од 2001 до 2003 година заработи речиси 3 милијарди долари ширум светот. А пак, третиот дел, „Враќањето на кралот“ освои рекордни 11 „Оскари“, вклучително и за најдобар филм.
Во заедничката изјава за Variety, Џексон и неговите две најблиски соработнички од првата трилогија - Френ Волш и Филипа Бојенс, рекоа дека самата работа на Warner Bros. и Embracer подолго време го навестувала овој потег.
„Со нетрпение очекуваме да разговараме со нив па да ја слушнеме нивната натамошна визија за франшизата“, изјави триото Џексон, Волш и Бојенс.
Embracer ги стекна правата за брендот, коишто се однесуваат на сите филмови, игрици, предмети, сувенири, тематски паркови и продукции во живо, кога го купи Middle-earth Enterprises во 2022 година.
Новите филмски раководители на Warner Bros. - Мајк де Лука и Пем Абди стојат зад новиот повеќегодишен договор што навестува повеќе играни филмови.
„И покрај целиот обем и сета љубов спакувани во двете трилогии, огромниот, комплексен и блескав универзум отсонуван од Џ.Р.Р. Толкин останува во голема мера неистражен“, соопштија тие.
Де Лука и Абди навестија и дека секој нов нареден филм нема нужно да го повторува она што го покриваа досегашните филмови на Питер Џексон.
