Фудбалерот на Баерн, Лукас Ернандес, избегна затворска казна во крајно бизарниот случај покренат во Шпанија, на крајот добивајќи условна казна од 4 години.
Неодамна му беше одредена казна од 6 месеци затвор поради кршење на забрана за пристап, но судот во Мадрид ја поништи таа одлука и фудбалерот нема да оди на служење казна во затвор.
Во декември, 2019 година тој беше осуден поради кршење на забрана за пристап до неговата партнерка Амелија Оса Љоренте. Позадината на оваа приказна е бизарна и неверојатна.
На Лукас и Амелија им беше забрането да се видат 6 месеци откако Французинот беше прогласен виновен за семејно насилство по караница во 2017 година.
И двајцата беа казнети со општествено-корисна работа, не смееја да се доближат помалку од 500 метри еден од друг. Но, во јуни истата година, четири месеци по казната и забраната, тие се венчаа во Лас Вегас и отпатуваа на меден месец на Бахами.
Кога се вратија во Мадрид беа задржани на аеродромот, а Лукас мина една ноќ во притвор. Обвинителството потоа побара да биде осуден на една година затвор поради прекршување на забраната за пристап.
Сега е јасно дека нема да оди во затвор, но доби условна казна од 4 години, пренесе DW.
Ернандес стигна во Баерн во 2019 година, кога германскиот клуб плати откупна клаузула на Атлетико Мадрид од 85 милиони евра, што го прави најскап играч во баварскиот клуб.
