Британската актерка Наоми Вотс, која двапати беше номинирана за Оскар, ќе се појави во улогата на „харизматична аристократка“ во спиноф серијата чие дејство ќе биде сместено 1.000 години пред случувањата во „Game of Thrones“.
Се работи за серија која е ко-креирана од авторот Џорџ Р.Р. Мартин и е еден од петте нови проекти на HBO базирани на „Game of Thrones“. Како сценарист на пилот-епизодата се потпишува Џејн Голдман, која работеше на филмот „Kick Ass“.
Дејството на серијата ќе се одвива 1.000 години пред случувањата во „Game of Thrones“ и ќе ја раскаже приказната за „падот од Златната ера на херои до најтемниот час на светот“. Најавите од HBO велат дека во спинофот ќе се дознае за изворните приказни на Белите одачи, мистериите на Истокот и легендите за Старк – а ниту една од овие приказни не се онакви какви што очекувате.
Наоми Вотс поминува низ тежок период откако нејзиниот последен ангажман за Netflix беше предвреме прекинат бидејќи серијата „Gypsy“ беше откажана по само една сезона. Добра вест за неа е што во последната недела доби два нови ангажмани, едниот е гореспоменатиот а другиот е во новата серија на Showtime базирана на случајот со контроверзниот директор на Fox, Роџер Ејлс.