Очигледно фудбалерите на боливискиот клуб Олвејс Реди се секогаш подготвени, а тоа на дело го демонстрираат ноќеска во Копа Либертадорес кога славеа со 6:1.
Ноќеска во Боливија беше испишана историја на Копа Либертадорес. Натпреварот од елитното јужноамериканско клупско натпреварување се одигра на 4.090 метри надморска височина, а високиот резултат од 6:1 кој беше постигнат не е никакво изненадување.
Боливискиот клуб Олвејс Реди (Always Ready, или во превод Секогаш Подготвени) го пречека перуанскиот Спортинг Кристал во првиот натпревар од 2. квалификациско коло на Копа Либертадорес, а сите јужноамерикански медиуми пред натпреварот изразија загриженост бидејќи јужноамериканската конфедерација (КОНМЕБОЛ) му дозволи на боливискиот клуб да игра натпревари на неговиот стадион „Виља Инхенио“, кој се наоѓа на 4.090 метри надморска височина во, погодете како се вика градот - Ел Алто, што во превод значи „височини“.
Имено, луѓето можат да имаат потешкотии со дишењето веќе на 2.100 метри, а со оглед на тоа дека Олвејс Реди игра на двојно поголема височинна, јасно беше дека нивните противници немаат исти услови за игра.
Фудбалерите на Олвејс Реди се аклиматизирани на недостаток на кислород, па немаат проблем да трчаат 90 минути, а тоа се виде и синоќа. И не бадијала го носат тоа име, тие се секогаш подготвени.
Резултатот на полувремето беше 1:1, а потоа во продолжението Перуанците останаа без сили, не можеа повеќе да трчаат во невозможните услови за игра и примија уште пет гола.
Корисниците на социјалните мрежи по натпреварот беа бесни на КОНМЕБОЛ, а најчестиот коментар на Х гласеше: „Дали сега ви е јасно зошто натпреварот не требаше да се игра на височина од 4 километри?“.
Она што е особено интересно е што во листата на стрелци се запиша и Моисес Паниагуа, кој со 16 години и 188 дена стана вториот најмлад стрелец во историјата на Копа Либертадорес.
Паниагуа е најдобар пример за нееднакви услови за екипите на стадионот „Виља Инхенио“. Имено, тој дебитираше на 14 години во боливискиот шампионат и веднаш постигна гол, а досега има постигнато 5 гола за „секлогаш подготвените“. Се разбира, сите пет на домашен терен.
Интересна коинциденција е тоа што Олвејс Реди игра во бели дресови со црвена лента, исто како дресовите на репрезентацијата ан Перу, од каде што е Спортинг Кристал. Таква комбинација имаат и аргентински Ривер Плејт и шпански Рајо Ваљекано.
Реваншот е закажан за 28 февруари во Перу, но јасно е дека боливискиот клуб ќе продолжи понатаму и ќе игра против подобриот од дуелот меѓу венецуелскиот Пуерто Кабељо и уругвајскиот Насионал од Монтевидео.