Од напаѓачот на Удинезе ќе се очекува гол во мрежата на Грузија на претстојниот бараж за пласман на ЕУРО.
„Конечно дојде собирот и подготовките за нашиот историски натпревар. Четири, пет години се бориме за ова и сега е време да се подготвиме за најважниот натпревар во историјата на македонскиот фудбал. Јас и цела репрезентација ветуваме дека ќе го дадеме максимумот за да ја оствариме целта. Ќе биде сосема поразлично од претходните натпревари. Срцето и желбата за победа ќе решаваат“, вели Несторовски.
Во двата натпревара против Грузија во рамките на Лигата на нации играни минативе два месеца Несторовски настапи, но не постигна гол. Во септември влезе од клупата во 59. минута, а во октомври беше стартер и играше до 71. минута.
„Знаеме кои се добри, а кои лоши страни на Грузијците, но овие денови ќе ги анализираме и се надевам на многу позитивни работи. Имаме многу големи натпревари зад нас, не чувствуваме притисок. Гордо ќе ја претставуваме Македонија и се надевам дека ќе се пласираме на Европското првенство“, заврши тој.
Македонија и Грузија играат в четврток во Тбилиси. Победникот ќе обезбеди историски пласман на ЕУРО.
