Тимот кој ја организира Spark.me, една од најголемите маркетинг конференции во Југоисточна Европа, која се одржува на 26. и 27. мај во Будва (со серија специјализирани работилници закажани за 25. мај), објави ново име на говорник на Spark.me 2018. Станува збор за Бојд Малтерер (Boyd Multerer), поранешен главен инженер за Xbox играчката конзола, кој ги основаше сервисите Xbox Live и XNA.
Работејќи во Xbox тимот, Малтерер во 2008 година го стартуваше и четири години го управуваше Xbox Live, онлајн платформа која ги поврзува играчите и овозможува размена и делење на мултимедијални содржини. Во 2004 година го основаше XNA, збир алатки кои на програмерите и дизајнерите им овозможуваат полесно и поефикасно развивање на игри. Малтерер го водеше и тимот кој беше задолжен за оперативниот систем за Xbox One конзолата, во чија надлежност беа сите клучни елементи, почнувајќи од кернелот, преку системот за безбедност, до апликациите, интерфејсот и Kinect.
Oткако го напушти Microsoft во 2014, Малтерер се занимава со истражување и создавање на оперативни системи за уреди поврзани во рамки на Интернет на нештата (Internet of Things). Користејќи знаења кои ги стакнал со претходните искуства, денес е фокусиран на безбедност, зголемување на ефикасноста и поедноставување на програмирањето. Малтерер до сега има пријавено околу 50 патенти од кои 26 се веќе официјално одобрени. Управувал со најразлични проекти, од најмали до оние со буџети од 100 милиони долари.
Организаторите на spark.me претходно ги објавија имињата на двајца овогодишни говорници - тоа се Mark W. Schaefer (еден од водечките светски стратези во маркетингот на друштвените медиуми кој своето знаење и искуство ги дели на еден од петте најпосетувани блогови на светот {grow}) и Kerry O’Shea Gorgone (директорка за стратегии во MarketingProfs), водечки извор на информации за повеќе од 600.000 маркетинг професионалци ширум светот и водител на Marketing Smarts подкастот. Во наредниот период ќе бидат објавени имињата на останатите говорници на конференцијата.
