Четиринаесеттото продолжение на конститутивната седница почна со говор на пратеничката Даниела Рангелова од ВМРО-ДПМНЕ.
Во слична атмосфера како и вчера, на нејзиниот говор се надоврзуваат пратеници од нејзината партија. Се редеа прашања околу истата теза околу платформата на албанските партии.
„Јас како пратеник немам ништо против албанскиот народ. Ние сакаме да живееме заедно, да имаме соживот со нашите сограѓани. Проблем е што таа платформа е донесена од друга држава. Ги повикувам пратениците да говориме за оваа платформа,што треба, што не треба да има. Исто така предложив да се изјаснат сите пратеници поеднично кој е за, кој е против оваа платформа“.
Нејзиниот колега Крсто Мукоски ги повика помалите партии и пратениците кои доаѓаат од граѓанскиот сектор да се изјаснат дали се согласуваат со заедничката декларација на албанските партии.
„Да ги прашаме луѓето од Шарената револуција дали се согласуваат со платформата, дали тие протестираа за оваа платформа? Да ги прашаме и другите од НСДП, од ЛДП. Неопределените да ги прашаме? Кога ќе се изјаснат сите тие луѓе, како и оние што протестираат надвор, можеме да избереме комисија и претседател на Собранието. Кога ќе одговориме на овие прашања, ќе видиме дали ова мнозинство е реално.
Засега пратениците кои беа прозвани не се изјаснуваат, а молчат и пратениците од СДСМ. Инаку, Собраниската седница веќе трета недела е сопрена на третата точка од дневниот ред, односно верификување на мандатот на Комисијата за избори и именувања.
Непосредно пред отворање на расправата за збор се јавија над 50 пратеници, а досега е исцрпена дискусијата за само шест.
