Влезот на зградата каде што е сместен Уставниот суд утрово осамна во боите на „Шарената револуција“ откако демонстрантите, кои неколку пати беа спречени да го искажат своето незадоволство од работата на Судот, ноќеска го бојадисале објектот во повеќе бои.
За претседателката на Уставниот суд, Елена Гошева, тоа претставува напад врз Судот и притисок врз работата на судиите. Пред да ја започне седницата на којашто се разгледуваше иницијативата за оценување на уставноста на одлуката за распуштање на Собранието таа се осврна на боењето на зградата на Уставниот суд.
„Некој сака да престане да работи Судот, да не се држат седници на Судот и да владее хаос. Уставниот суд и уставните судии во изминатиот период се под директни притисоци на одредена група граѓани, но Судот ќе продолжи да работи и нема да се оствари целта на нивните притисоци. Секој има право на протест, но во едно демократско општество правото на протест треба да се остварува мирно и достоинствено, а не преку покажување агресија“, рече Гошева.
Граѓанското движење „Протестирам“ пред седницата ги повикаа уставните судии да ја одиграат „својата улога на заштитници“ на правата и слободите на граѓаните и да „застанат на страната“ на правдата и законот.
