Очите на светската јавност во претходните неколку недели се вперени во Авганистан, каде талибанците ја презедоа контролата над целата земја. Претседателот Ашраф Гани избега, за да на тој начин, според него, се избегне крвопролевање.
Епилог на тоа се сцените во кои илјадници луѓе панично сакаат да избегаат од Авганистан, упатувајќи се на аеродромот во Кабул.
Некои од нив загинаа во обидот да излезат од земјата, а тажни се и глетките од очајни мајки како ги молат американските војници да ги спасат нивните деца.
Но, сега се појави уште порадикална и понасилна организација, од која и талибанците се плашат. Станува збор за група на Исламска држава, основана во 2015 година, а која за цел има да воспостави калифат на територијата на Големиот Хорасан којашто вклучува делови од Иран, Авганистан, Таџикистан, Туркменистан и Узбекистан. ИСИС-К првично почна како раздвоена група на пакистански талибанци.
Белата куќа објави дека има информации дека ИСИС-К планира да организира бран напади за да ги осуети напорите за формирање влада во Авганистан. Колку е опасна ситуацијата говори и податокот дека американските вооружени сили и ЦИА изведуваат тајни операции со цел да ги евакуираат своите граѓани надвор од аеродромот во Кабул, односно дека е се поголема заканата дека ИСИС-К ќе започне со серија терористички напади, објави The Wall Street Journal.
Џо Бајден е информиран за заканите кои ги претставува оваа терористичка организација. Според некои наводи, лидер е извесен Шахаб ал Мухаџир, а имаат изведено околу 100 напади на цивили и уште 250 напади на американски, авганистански и пакистански сили.
Еден од последните напади се случи во мај кога ИСИС-К уби најмалку 68 Авганистанци, а повредени беа 165 луѓе кога беа разнесени два автомобила пред училиште во Кабул.
Талибанските стражари продолжуваат да ги штитат цивилите околу аеродромот во Кабул, изјави синоќа анонимен талибански функционер, додавајќи дека западните сили мора да се придружуваат на рокот за завршување на евакуацијата од Авганистан до крајот на овој месец.
Талибанците велат дека ги ризикуваат животите кај аеродромот во Кабул, додека Исламска држава се заканува.
