На азиските берзи денеска паднаа цените на акциите бидејќи инвеститорите беа загрижени од појавата на нова подваријанта на коронавирусот во Шангај и затоа што се плашеа од агресивно зголемување на каматните стапки од страна на американската централна банка. Индексот на MSCI на азиско-пацифички акции, без Јапонија, беше во минус за повеќе од 1 процент околу 7:00 часот.
Во исто време, индексот Nikkei порасна за 1,3 отсто на берзата во Токио, додека цените на акциите во Јужна Кореја, Австралија, Шангај и Хонгконг паднаа меѓу 0,1 и 2,3 отсто. Остриот пад на кинеските пазари е резултат на веста дека во Шангај е откриена нова подваријанта на сојот омикрон на коронавирусот.
Поради ова, инвеститорите стравуваат дека локалните власти повторно ќе воведат рестриктивни мерки во овој деловен и финансиски центар на Кина, што би го забавило растот на втората по големина економија во светот. Притисокот на локалните пазари е последица на остриот пад на цените на акциите на технолошките гиганти, како Alibaba и Tencent.
Инвеститорите стравуваат и дека американската централна банка повторно агресивно ќе ги зголеми клучните каматни стапки во јули, како што тоа го направи во јуни.
Во петокот беше објавено дека бројот на вработени во САД се зголемил за 372.000 во јуни, значително повеќе од очекуваното, додека стапката на невработеност стагнира на ниски 3,6 отсто. Просечната саатница, пак, е зголемена за 5,1 отсто во однос на истиот период лани, што покажува дека инфлациските притисоци не стивнуваат.
И сето ова значи дека ФЕД може да продолжи со агресивно заострување на монетарната политика.
Внимание има и на берзите бидејќи во среда ќе биде објавен извештајот за потрошувачките цени во САД, што би можело значително да влијае на насоката на пазарот. Аналитичарите анкетирани од Ројтерс проценуваат дека тој дополнително се забрза до 8,8 отсто во јуни, ново највисоко ниво во повеќе од 40 години.
Деловните резултати на американските компании и оваа недела ќе бидат во фокусот на инвеститорите, со оглед на тоа што започнува сезоната за објавување на кварталните финансиски извештаи. И додека повеќето азиски берзи утрово паднаа, јапонскиот индекс Никеи значително порасна. Ова делумно е благодарение на резултатите од парламентарните избори одржани во неделата.
Јапонската конзервативна коалициска влада е на добар пат да освои мнозинство места во Горниот дом. Според излезната анкета на јавниот радиодифузен сервис НХК, Либерално-демократската партија (ЛДП) на премиерот Фумио Кишида, заедно со коалициската партија Комејто, би можеле да освојат меѓу 69 и 83 од 125 места во Горниот дом. Тие избори беа одржани само два дена откако поранешниот премиер Шинзо Абе беше убиен на кампањата во петокот.
А на валутниот пазар вредноста на доларот во однос на кошничката валути дополнително се зголеми, откако минатата недела скокна за 1,5 отсто.
Индексот на доларот, кој ја покажува вредноста на американскиот долар во однос на другите шест најважни светски валути, зајакна за 0,4 отсто, на 107,39 поени, недалеку од највисокото ниво во последните 20 години. Истовремено, курсот на доларот во однос на јапонската валута порасна за 0,6 отсто, на 136,95 јени, а во еден момент достигна и 137,28 јени, највисоко ниво во последните 24 години.
Американската валута зајакна и во однос на европската, за 0,38 отсто, па цената на еврото се лизна на 1,0145 долари, блиску до најниското ниво од крајот на 2002 година. Цените на нафтата, пак, дополнително паднаа, откако минатата недела се лизнаа за повеќе од 3 отсто. Цената на барелот на лондонскиот пазар се намали за 0,65 отсто, на 106,32 долари, додека на американскиот пазар цената на барелот се намали за 0,91 отсто, на 103,94 долари.
