Најмалку 13 лица загинаа, а тројца се повреднеи во стампедо во ноќен клуб во главниот град на Перу ноќта во саботата спроти неделата.
Стампедото се случило за време на полициска рација спроведена како дел од проверките за почитување на мерките за сузбивање на ширењето на коронавирусот.
Интервенцијата на полицијата следела по повиците да биде прекината нелегалната забава на која присуствувале над 120 луѓе. Полицијата морала да интервенира бидејќи биле прекршени протоколите за одржување физичка дистанца, како и забраната за собирање големи групи на луѓе за време на пандемија.
Во соопштението од Министерството за внатрешни работи стои дека полицијата не користела солзавец или какво било друго оружје по влегувањето во објектот.
Стампедото наводно се случило кога присутните на забавата се обиделе да побегнат од полицијата на вториот кат.
Во тек е истрага за да се идентификува сопственикот на ноќниот клуб и организаторите на забавата. Уапсени се 23 лица.
Перу беше една од првите земји во Јужна Америка кои почнаа со спроведување на строги рестриктивни мерки против коронавирусот. Покрај ваквите напори, Перу пак спаѓа меѓу најтешко погодените латиноамерикански земји.
Според податоците на Универзитетот Џонс Хопкинс, во Перу се регистрирани 576.000 заразени со COVID-19, од кои 27.000 починале.
