Накратко настанала општа узбуна во сиднејската Таронга зоолошка градина откако пет лава успеале да излезат од својот кафез.
Животните - еден возрасен и четири млади - биле забележани надвор од својот кафез околу 18:30 часот по локално време. Зоолошката веднаш била испразнета и затворена. Возрасниот лав и три од младите биле мирно вратени во кафезот, додека за четвртиот морало да биде употребена инјекција за смирување.
Властите на зоолошката наведуваат дека никој не бил повреден, ниту од посетителите ниту од лавовите.
Засега нема информации како лавовите успеале да излезат од кафезот, а извршниот директор на зоолошката, Сајмон Дафи, најави дека ќе биде отворена истрага.
Откако го напуштиле кафезот лавовите се стационирале во тампон зоната, на околу 100 метри од најблиското место каде што во моментот престојувале посетители.
Десет минути откако бил приметен инцидентот еден од чуварите го вклучил алармот, а вработените веднаш ги префрлиле посетителите на безбедна локација.
Во 2009 година лавица побегна од Зоолошката градина Мого јужно од Сиднеј и мораше да биде застрелана поради опасноста која ја предизвика по луѓето.
