Претседателот на Шри Ланка Готабаја Раџапакса побегна од земјата по масовните демонстрации поради длабоката економска криза во земјата, пренесе BBC.
Претседателот се криеше откако незадоволните граѓани упаднаа во неговата палата во саботата. Неговиот брат, поранешниот министер за финансии Басил Раџапакса исто така ја напушти земјата, која е силно погодена од економската криза.
Според пишувањето на Bloomberg, претседателот со воен авион избегал на Малдиви.
Демонстрантите бараа претседателот и премиерот да си заминат или да се соочат со многу поголеми демонстрации. Сега се очекува и премиерот да ја напушти земјата.
Раџапакса претходно вети дека ќе поднесе оставка во средата, по масовните демонстрации.
Луѓето го обвинуваат за најголемата економска криза во последните неколку децении. Со месеци се борат со недостиг на основни средства за преживување како струја, гориво, храна и лекови.
