Скулптурата од ѕвездата на Ливерпул привлече големо внимание откако беше изложена како симбол на надеж за египетските млади луѓе, но нас нѐ интересира мислењето на Мохамед Салах.
Чудниот тренд на смешни, бизарни и контроверзни статуи има нова жртва: Мохамед Салах.
Египетскиот фудбалер Мохамед Салах ќе се чуди со што заслужи да добие ваква „чест“ – статуа која наводно треба да го има неговиот лик. Но, веруваме дека ни тој самиот не може да се препознае во ова дело, кое беше креирано од Маи Абдел Алах.
Светскиот младински форум ја промовираше оваа статуа за да ги мотивира младите Египќани дека можат да бидат херои исто како Салах, но комичниот дизајн на телото на статуата предизвика многу негативни реакции и критики, a некои рекоа дека изгледа полошо од статуата на Роналдо во Мадеира. Малите раце и нозе, нерамномерното тело и огромната глава прават Салах да изгледа како карикатура, а не како самиот себе.
Новата сезона не започна баш најдобро за Мохамед Салах, но тој полека почна да се враќа во голгетерска форма. Во 15 натпревари во сите натпреварувања оваа сезона тој забележа 7 гола и 3 асистенции, а ќе се обиде да ги зголеми овие бројки веќе во вторник, кога Ливерпул оди на гостување во Белград кај Црвена звезда.