Физичка пресметка меѓу млади жители на Кичево била прекината по реакција на полициски службеник кој испукал предупредувачки истрел од пиштол во воздух.
Како што информира портпаролот на охридската полиција Стефан Димоски, во полициската станица во Кичево приведени се А.И.(22), Ф.Ч.(23), Ф.К.(18) и А.К.(22), сите од Кичево.
Тие на 8 јуни во 21:40 часот, на крстосницата на булеварот „Ослободување“ со улицата „Рудничка“ во Кичево, го нарушиле јавниот ред и мир со меѓусебна физичка пресметка.
– Со цел да го спречи натамошниот тек на нарушувањето, реагирал полициски службеник-припадник на криминалистичката полиција кој во моментот не бил на должност, тој ја покажал службената легитимација и издал усна наредба кон учесниците да престанат со тепачката.
Во моментот, еден од нив, извадил остар предмет со намера да го употреби, по што, полицискиот службеник од службениот пиштол во воздух испукал еден предупредувачки истрел.
Веднаш потоа тепачката престанала, а учесниците се лишени од слобода, објасни Димоски.
Против нив, ОВР Кичево ќе поднесе соодветна пријава.
