Полските пратеници одлучија референдумот за зголемување на границата за пензионирање и политиката за азил да се одржи на денот на парламентарните избори на 15 октомври, а со овој потег, сметаат аналитичарите, владата сака да ги мобилизира своите гласачи.
Владејачката националистичка партија Право и правда (PiS) вели дека сака народот да одлучува за четири прашања - приватизација на државните компании, зголемување на границата за пензионирање, подигање ограда на границата со Белорусија и планирана реформа на европската политика за азил. Но, опозицијата ја обвинува PiS дека го користи референдумот за да ги мобилизира своите гласачи и да ја демонизира опозицијата.
PiS тврди дека главната опозициска либерална партија Граѓанска платформа (PO) е продолжување на странските интереси, особено оние во Германија, и дека сака да продава државен имот на компании од таа земја. Владата ја критикува и PO за мекост кон мигрантите и потсетува дека кога беше на власт, таа партија ја зголеми границата за пензионирање, со што им сугерираше на гласачите дека тоа ќе го направи повторно ако има шанса повторно да управува со земјата.
Од PO ги отфрлаат критиките и велат дека актуелната власт е таа што продавала државни фирми под цената и ги вработувала своите поддржувачи на добро платени работни места. Што се однесува до мигрантите, PO вели дека PiS не била ефикасна во запирање на илегалните мигранти и го зголемил бројот на визите за работниците од Азија и Блискиот Исток. Минатата година Унгарија организираше референдум за ЛГБТ прашања во исто време со изборите.
