Поранешниот руски генерал Евгениј Бужински предупредува дека светот се наоѓа пред последната војна во историјата на човештвото. Причината, според него, се наоѓа во случајот со труењето на некогашниот руски шпион, Сергеј Скрипал.
Според Бужински, дипломатските односи помеѓу Русија и Западот се разнишани и се наоѓаат на ниво полошо од Студената војна, и затоа би можеле да завршат во вооружен конфликт.
Пензионираниот генерал Евгениј Бужински за BBC Radio 4 изјави дека ситуацијата е полоша од Студената војна бидејќи доколку ваквиот однос продолжи и ситуацијата се одвива по природниот пат, би можела да заврши многу полошо од Студената војна.
„Вистинска војна, многу посурова од Студената војна се заканува на човештвото и тоа би можела да биде последната војна во историјата на човештвото“, рече Бужински.
Тој додаде дека вистинската причина за војната не е нападот на рускиот шпион Скрипал и неговата ќерка, туку она што се случи подоцна. Односот помеѓу големите сили, според него, е целосно срушен.
„Погледнете го притисокот од САД, велат дека тој притисок нема да престане. А што ќе постигнете со тоа? Ако мислите дека ќе го смените режимот во Русија, тогаш тоа е бескорисно, ја ставате Русија во ќош, а тоа е опасна работа“, додаде некогашниот руски генерал.
Поранешниот украински претседател Виктор Јушченко, кој беше отруен во текот на претседателската кампања вчера го предупреди светот дека Европа е „слепа за опасноста која доаѓа од Русија“.
За сето ова време, Русија негира дека има било каква поврзаност со труењето на некогашниот шпион Скрипал, кој и понатаму се наоѓа во критична состојба.