Поранешната принцеза на Катар е пронајдена мртва во нејзиниот дом во Шпанија, среде битката за старателство со поранешниот сопруг кого го обвини за злоставување на едно од нивните деца.
Касија Галанио почина на 45 години, а беше трета жена на милијардерот Абдулази бин Калифа ал Тани (73), вујко на Емирот на Катар. Таа тврдеше дека нејзиниот поранешен сопруг, некогашниот министер за нафта и финансии во Катар, сексуално малтретирал една од нивните три ќерки.
Галанио, која живееше во раскошен стил, одеше на забави со славни личности и присуствуваше на венчавката на Софија Вергара во 2015 година. Пронајдена е мртва во Шпанија, по сомнежи дека се предозирала.
Според пишувањето на Le Parisien, шпанската полиција го пронајде нејзиното тело во кревет, без знаци на физичко насилство. Таа е пронајдена откако нејзината најмала ќерка од Париз ја извести шпанската полиција дека со денови не може да стапи во контакт со мајка си.
Весникот пишува дека домарот на зградата дозволил полицајците да влезат во нејзиниот стан во неделата околу 8 часот наутро. На 19 мај судот во Париз ги отфрлил нејзините барања за старателство над ќерките. Галанио неодамна мина неколку месеци во болница, а медиумите пренесоа дека страдала од нервен слом. Како резултат на тоа, судијата го одложил случајот додека не изврши психолошка проценка за подобро да се разберат околностите во семејството.
Парот има седумнаесетгодишни и ќерка која има 15 години и понатаму живее со таткото во луксузен стан во Париз, каде тој е прогонет по пучот предводен од неговиот полубрат Хамад бин Калифа ал Тани во 1995 година.
Поранешниот кралски пар веќе 15 години се наоѓа среде битка за старателство над децата. Ал Тани ја обвини поранешната сопруга дека е алкохоличарка со ментални проблеми, а таа него за сексуално малтретирање на една од ќерките. Јавното обвинителство во Париз отвори истрага за обвинувањата за тежок сексуален напад.
Галанио по потекло е од Полска, израсната е во Лос Анџелес, а бившиот сопруг го запознала кога имала 19 години.
Ќе биде направена обдукција за да се открие точната причина за смртта.
